Pasėdalėnėms žėnė ėš Palonguos
2023 m. spalė 14 dėina vīka pakartuotėna šaukėma Žemaitiu partėjės Palonguos skīriaus ataskaitėnis-rinkėmėnis sosėspėitėms. Atsėšaukė Žemaitiu partėjės Palonguos skīriaus senbovē, aktīvistā ė svetē. Sosėspėitėmou pėrmėninkava jauns Žemaitiu partėjės Palonguos skīriaus pėrmėninks Žemaitis Tadis, katras pateikė trumpa ataskaita aplink skīriaus veikla.
I sosėrinkėma, katras vīka kavėnie „Delfai“ (Vidmantūs), bova pakvėista naujē ėšrinkta Žemaitiu partėjės pėrmėninkė Stražinskātė-Glinskienė Irena. Vīka iduomė pasėrokavėmā, pėrmėninkės prisėstatīms ė sosėpažėnėms so Žemaitiu partėjės Palonguos skīriaus aktīvo.
Partėjės pėrmėninkė pristatė ēnamūsius ėr esmėnius partėjės rēkalus, sopažindėna so tėkslās, ragėna ētė nuoseklē, drōsē ėr vėiningā pėrmīn. Ragėna naožmėrštė kuožna dėina puoselietė žemaitėškoma savuo aplinkuo, keltė vielevas so žemaitėška atrėbutėka ėr simbuolėka pri nomūm, īstaigu, rėngėniūs, ogdītė vākus žemaitėškuo dvasiuo, paragītė prietelius, sosiedus vėinītės vardan Žemaitėjės atgėmėma.
Bova ėšklausītė kuožna dalīvė pasėsakīmā, īžvalgas. Basėrokoujint priēta pri ėšvadas, ka rēk ėiškuotė bėndrūm sotarėma taškūm, ogdītėis tolerancėjė ė pakontoma diel skėrtingu religėniu isėtėkėnėmu, naprimestė sava nuomuonės kėtīms partietems. Žemaitiu partėjės pėrmėninkė pasiūluojė kuožnam dalīviou pamėslītė aplink trumpa, muotīvoujonti, skombi šūki, gairė, katron galietom pristatītė sekontem žemaitiu palongėškiu partėnem sosėspėitėmė. Vėina gairė pasiūluojė jaunāsis ūkėninks Gustīs Gintars: „Aš dėdžiounous būdams žemaitio!“.
Vėsė sotarė, ka rēk kou platiau nauduotė žemaitėškus atrėbutus, rekvėzitus, sovenīrus, žėnklus, vartuotė žemaitiu kalba, muokītėis žemaitėška rašta.
Žemaitiu partėjės Palonguos skīriaus pėrmininko bėndro sotarėmo parrinkts Žemaitis Tadis.
Nuogni diekavuonė Žemaitiu partėjės pėrmėninkē Stražinskātē-Glinskienē Irenā ož atvīkėma sosėtėktė so palongėškēs partietēs, vėsīms sosėrinkosīms skīriaus narems, prietelems, pariemosīms sosėspėitėma gardiuom vaišiem.
Žemaitis Tadis, ŽP Palonguos skīriaus pėmėninks
