Tēp nuorēs, tēp nuorēs prietelius pasveikintė! Na so darganuoto rodėnėnio dongom,
na so šaltās lītaus lašās, krimtōntēs ož apkaklės (dongaus ėr uora jok napasėrinksi).
Šėndėin – Konstėtucėjės dėina! Bet džiaugsma ta nier… Diel kuo? – kažkas paklaus…
Vo kou džiaugtėis? Ana, mėzerėjė, īr sotrīpta, ėšbjauruota, solaužīta, ėšterliuota, sopartalinta. Kāp tuoks solaužīts dākts bagal tarnautė žmuonīms?!. Pėrmiausē rēk soremontoutė, atkaištė brudus, atpraustė ė tėk tumet apėntās galiesem glaustė pri šėrdėis.
Kas imsēs tuo darba? Kas būs tėi remontėninkā ė restauratuorē?
Žėnau vėina – gera meistra ronkuoms vėskas imanuoma! Patis geriausi meistrā – mes patis, tėi, katrėi žėnuom, kuo mums rēk! Konstėtucėjė niekou kalta, ka anon gvaltavuo kas nating. Kaltė esām mes, ka lēdām euruopėnems kosmopolitams dergtėis mūsa kėimė.
Gera žėnė – māstontis žmuonis gal sostabdītė ton nalaimė, pasakīdamis „STOP!“
Ė nikumet naožmėrškēm, ka nu mūsa patiūm pasėrinkėma priklausa ateitis – rītuo būs tēp, kāp pasėrinkuom šėndėin.
Vėsus žemaitius ė prietelius so Konstėtucėjės dėina! Nuors ėr pažeminta, bet ana īr. Mūsa valė anon prikeltė ont garbingas aukštomuos!
Žemaitiu partėjės pėrmėninkė Stražinskātė-Glinskienė Irena